У суботу, 26 верасня, ў Мінску на плошчы Бангалор пройдзе піўны фестываль, які запланаваны ў межах сталічнага восеньскага кірмашу. Арганізатарам гэтага мерапрыемства выступае Мінгарвыканкам.

На дадзены момант пра жаданне прыняць удзел у дадзеным фестывалі паведамілі толькі чатыры буйнейшыя айчынныя вытворцы: «Крыніца», «Аліварыя», «Брэсцкае піва» і «Лідскае піва». Спажыўцам будуць прапанаваныя больш за 80 гатункаў беларускага піва, у тым ліку новыя для нашай краіны нефільтраваныя гатункі, і таксама «жывое» піва.

Канчатковае рашэнне па правядзенню фестывалю было прынятае толькі сёння. Некаторыя піўныя і навінавыя сайты сёння раніцай паведамілі пра адмену гэтага мерапрыемства, бо «нечакана» ўзніклі супярэчанні звязаныя з пляцоўкай правядзення. Але Мінгарвыканкам днём канчаткова паведаміў, што фестываль усё ж адбудзецца. Такім чынам, восеньскі піўны фестываль будзе праходзіць ад 10 да 16 гадзінаў 26 верасня на плошчы Бангалор у Мінску.

Як паведамляе БЕЛТА, ААТ «Крыніца» стала першай піваваранай кампаняй Беларусі, якая пачала самастойна вырошчваць хмель. Прадпрыемства ўсур’ёз пайшло па шляху скарачэння імпартнай сыравіны ў вытворчасці.

Свой хмель «Крыніца» вырошчвае ў Маларыцкім раёне Брэсцкай вобласці. Засеяна больш за 50 гектараў, а першы ўраджай будзе сабраны ўжо ў гэтым годзе.

«Такую вытворчасць мы асвойваем упершыню ў рэспубліцы і паспяхова асвойваем. Гэта адпавядае 1.5 млн. еўра гадавога імпарту па хмелю», – паведаміў гендырэктар прадпрыемства ААТ «Крыніца».

Наконт аб’ёму імпартазамяшчэння пакуль што ранавата казаць, бо ўраджай яшчэ не сабраны. Але ня будзем сапсаваць аптымістычныя прагнозы кіраўніцтва прадпрыемства. А вось сцвярджэнне, што Крыніца з’яўляецца піянерам хмеляводства ў нашай краіне не вытрымлівае ніякай крытыкі. Справа ў тым, што, напрыклад, ў савецкія гады некаторыя калгасы той самай Брэстчыны спецыялізаваліся менавіта на вырошчванні хмелю. А Вялікае Княства Літоўскае ўвогуле з’яўлялася адным з асноўных імпарцёраў хмелю ў Заходнюю Еўропу.

Photo © wikipedia.org

Не, гэта зусім не акцыя змагароў за якасць айчыннага піва. Сам вытворца вырашыў прыбраць сваю рэкламу з тэлевізійнага эфіру на адзін дзень.

«3 ліпеня – асаблівы дзень для кожнага беларуса. Многія гады ён адзначацца як Дзень вызвалення рэспублікі ад фашысцкіх захопнікаў. У гэты дзень хочацца аказаць асаблівую ўвагу і выказаць павагу ветэранам Вялікай Айчыннай вайны, партызанам і падпольшчыкам, а таксама тым, хто працаваў для перамогі ў тылу. Мы мяркуем, што камерцыйная рэклама, у тым ліку піва, будзе не да месца ў эфіры тэлеканалаў у гэты дзень.» – патлумачыла намеры кампаніі кіраўніца аддзелу маркетынгу Людміла Аляксеенкава.

Рэкламу «Крыніцы» ў гэты дзень магчыма ніхто і не пабачыць, а вось выпіта самага «народнага» піва будзе невымерна. Нагадаем, што 3 ліпеня Беларусь традыцыйна адзначае «Дзень вызвалення рэспублікі ад фашысцкіх захопнікаў». Аднак, Аляксандр Лукашэнка надаў гэтаму святу статус Дня Незалежнасці, і цяпер святкаванні 3 ліпеня суправаджаюцца масавымі гуляннямі прыхільнікаў Прэзідэнта (так званых 83%). Несумненна, гэта адзін з тых дзён у годзе, калі краіна спажывае больш за ўсё спіртнога, у тым ліку і папулярнага ў народзе піва «Крыніца».

Photo © belbeer.com

Адзін з буйнейшых беларускіх бровараў, ААТ «Брэсцкае піва», пачаў рэалізацыю «жывога» піва.

«Жывое» піва валодае незвычайна насычаным смакам, які тлумачыцца наяўнасцю большай, у параўнанні са звычайным півам, колькасці бялкоў і дрожджаў. Гэта звязана з выключэннем з вытворчасці працэсаў фільтрацыі і пастэрызацыі.

Асартымент «жывога» піва ад брэсцкага вытворцы ўключае ў сябе тры маркі – «Белавежскае», «Stavka» і «Брэсцкае светлае». Аднак, у сувязі з абмежаваным тэрмінам захоўвання (да 5 сутак), рэалізацыя гэтага «жывога» піва будзе ажыццяўляцца толькі ў Брэсце. Пры гэтым яно не бутылізуецца, а прадаецца «у разліў».

Кампанія ААТ «Брэсцкае піва» і раней масава вырабляла непастэрызаванае піва, асноўная частка якога ішла на экспарт. Увядзенне на прадпрыемстве новых тэхналогій дазволіла акрамя адмовы ад пастэрызацыі выключыць з працэсу вытворчасці і фільтрацыю. Цяпер «Брэсцкае» стала насамрэч «жывым».

Віцебская кампанія «Дзвінскі бровар» паведамляе пра выпуск новых гатункаў свайго піва. Тры новыя гатункі піва «Дзвінскі бровар» будуць прадстаўлены на міжнароднай выставе «ПІВА-2009» у Мінску.

18-ая міжнародная выстава «ПІВА-2009» пройдзе ў Мінску з 7 па 10 красавіка 2009 году ў павільёне БелЭКСПА па адрасе пр-т Пераможцаў 14. На гэтай выставе віцебскае прадпрыемства прадставіць тры новыя гатункі з шэрагу гандлёвай маркі «Дзвінскі бровар»: «Лёгкае», «Губернскае» і «Цёмнае золата». У продаж піва павінна паступіць ужо ў канцы красавіка – пачатку траўня гэтага году.

Нагадаем, што першы гатунак пад маркай «Дзвінскі бровар» – «Моцнае» быў выпушчаны ў сярэдзіне лістападу 2008 году. Па словах вытворцы, маркай «Дзвінскі бровар» будзе заменена старая гандлёвая марка «Мікалаеўскае». Адзінае, што застаецца не да канца зразумелым – ці будзе новае піва, як і ягоны папярэднік, непастэрызаваным. Пакуль дакладная інфармацыя адсутнічае, але мяркуючы па ўсім, «Дзвінскі бровар» усё ж стане пастэрызаваным, паколькі першы гатунак, «Дзвінскі бровар – Моцнае», з’яўляецца пастэрызаваным. У перспектыве, піва «Дзвінскі бровар» зойме каля 65% у агульным аб’ёме выпускаемага кампаніяй піва.

Да выпуску піва гандлёвай маркі «Дзвінскі бровар», аднайменнае прадпрыемства спецыялізавалася на непастэрызаваным піве. Выпускалася піва двух марак: «Мікалаеўскае» (гатункі: «Светлае», «Цёмнае», «Пілзнер») і ліцэнзаванае нямецкае піва «Urstein» (гатункі: «Premium», «Dunkles Bier», «Export», «Па-Кельнскі»).

Ужо праз тыдзень у Гомельскай вобласці будзе забаронены гандаль півам у начны час – паведамляе БелаПАН. Пастанаўленне Гомельскага аблвыканкаму аб забароне пачне дзейнічаць 6 красавіка. Акрамя таго, пастанаўленне цалкам забараняе продаж піва ў мелкарознічнай гандлёвай сетцы – так званых “кіёсках”.

На тэрыторыі ўсёй вобласці будзе забаронены гандаль півам і слабаалкагольнымі напоямі моцнасцю да 7% з 23 гадзінаў вечара да 8 гадзінаў раніцы. Выключэннямі будуць толькі пункты грамадскага харчавання, павільёны з гандлёвым залам, аўтакрамы, а таксама сезонныя кавярні і міні-кавярні.

Новаўводзіны тычацца і правілаў правядзення масавых мерапрыемстваў. Так, за дзве гадзіны да пачатку і на час правядзення любых масавых мерапрыемстваў у радыюсе 500 метраў гандаль півам і слабаалкагольнымі напоямі будзе забаронены.

Нагадаем, што ў дадзены момант у Гомелі дзейнічае забарона на начны продаж толькі моцных алкагольных напояў.

Источник: naviny.by

Photo © marpravda.ru

4 красавіка 2009 году ў Мінску пройдзе Другі міжнародны з’езд калекцыянераў піўной атрыбутыкі. Арганізатарам выступае Беларускі клуб калекцыянераў піўной атрыбутыкі. Праграма з’езду традыцыйная: абмен, камунікаванне, піва, конкурсы.

Заяўкі на ўдзел і час пражывання неабходна падаць не пазней за 15 сакавіка. Усе падрабязнасці наконт самога з’езду і пражывання, а таксама кантактную інфармацыю арганізатараў можна знайсці на форуме: http://belbeer.borda.ru/?1-2-0-00000054-000-0-0-1235391794.

Першы міжнародны з’езд прайшоў у красавіку 2008. У з’ездзе прынялі ўдзел каля ста калекцыянераў з Беларусі, Расіі, Украіны, Латвіі, Літвы, Польшчы, Германіі, Чэхіі. У межах з’езду прайшоў конкурс-дэгустацыя беларускаага піва сярод замежных удзельнікаў, а таксама паказ піўных этыкетак піўзаводу «Крыніца» ад моманту ягонага адкрыцця да нашых дзён.

Рух калекцыянераў піўной атрыбутыкі зарадзіўся ў Беларусі ў канцы 1980-х гадоў. Беларускі клуб калекцыянераў піўной атрыбутыкі быў заснаваны вясной 2006 году.

Photo © Alivaria

Беларускія вытворцы алкагольных і безалкагольных напояў да апошняга моманта не пакідалі надзею на тое, што падатковыя і прыродаахоўныя органы зменяць сваё рашэнне. Атрыманыя імі новыя патрабаванні па ўплаце падатку на здабычу вады ўзраслі ў 121,9 разы – на столькі, на колькі ў мінулым годзе была павялічана стаўка гэтага экалагічнага падатку. Зараз за тое, каб атрымаць з паверхневых крыніцаў альбо з-пад зямлі 1 куб.м. беларускай вады для выпуску любога напоя, у тым ліку піва, прыйдзецца плаціць столькі ж, колькі за здабычу 2,1 грама золата. Што цікава, плаціць па новых стаўках вытворцаў напояў абавязалі заднім лікам – з 1 ліпеня 2008 году. 

Змяненні ў стаўках экалагічнага падатку, уключаючы стаўку на здабычу вады для выраблення алкагольных і безалкагольных напояў, былі зроблены ў верасні мінулага году на аснове ўказу Прэзідэнта Рэспублікі Беларусь №492. Менавіта па гэтаму дакементу памер падатку на здабычу такога рэсурсу, як звычайная пітная вада (нават не мінеральная), узрос у 121,9 разы – з 41 рубля за 1 куб.м да 5000 рублёў. Для параўнання: стаўка падатку на пітную ваду і ваду для гаспадарчых патрэбаў для насельніцтва і працаўнікоў прадпрыемстваў складае ўсяго 9,5–14 рублёў (у залежнасці ад таго, паверхневыя гэта ці падземныя крыніцы) за 1 куб.м, для СВК і фермераў – 0,48–0,8 рублёў за 1 куб.метр.

Яшчэ адно параўнанне можна правесці з падаткамі на здабычу вады ў Расіі, кампаніі якой з’яўляюцца асноўнымі канкурэнтамі беларусаў на піўным рынку. Так, у Расіі ў залежнасці ад рэгіёну стаўка падатку на здабычу вады складае ад 300 да 400 расійскіх рублёў (24-32 тысячы беларускіх рублёў). Але заўважце – не за 1 куб.м, а за 1000 куб.м. Відавочная канкурэнтная перавага расійскіх вытворцаў.

Але паралельна бачная і яўная мэта гэтых мераў, прынятых па ініцыятыве Міністэрства па падатках і зборам. МПЗ, падтрымліваемае Міністэрствам прыродных рэсурсаў і аховы навакольнага асяроддзя, не скрывае, навошта спатрэбілася павялічваць стаўку: каб павялічыць падатковыя паступленні. Пры існай у краіне колькасці вытворцаў алкагольных і безалкагольных напояў і тых аб’ёмаў вады, якія яны штодзённа здабываюць для свайго вытворчага працэсу, гэты падатак сапраўды можа стаць новай залатаноснай жылай для казны.

Адзін просты прыклад. Па новай стаўцы падатку на здабычу вады ЗЗАТ «Піваварная кампанія «Сябар» павінна была заплаціць у 2008 годзе 8 млн рублёў. Пасля зменаў у заканадаўстве ёй зараз выстаўлены патрабаванні на суму ў 105 разоў большую – 840 млн рублёў. З улікам вытворчага плану на гэты год «водны падатак» павінен быў абысціся прадпрыемству ў 34 млн рублёў, а выйдзе – у 3,5 млрд. Удзельная вага гэтага падатку ў сабекошце піва адпаведна ўзрасце з 0,03% да 3,7%.

3,5 млрд рублёў – гэта па сённяшнім курсе каля 900 тыс.еўра, сапраўды істотная сума, якую атрымае бюджэт толькі з аднаго прадпрыемства і толькі ў адной галіне. А трэба ўлічваць, што яшчэ існуюць і вытворцы лікёра-гарэлачных вырабаў, вытворцы безалкагольных напояў, сокавыя заводы і іншыя прадпрыемствы, якія ўжываюць ваду. Цяпер ужо сапраўды залатую ваду.

Крыніца: ej.by

Photo © improvemyincomenow.com

Ліцэнзаваную вытворчасць піва Budweiser плануецца арганізаваць на ААТ «Крыніца». Тэхнічным экспертам у перамовах паміж беларускім бокам і ўладальнікам гэтай маркі кампаніяй «Budejovicky Budvar» выступае чэская ZVU Potez. 

«У сярэдзіне студзеня спецыялісты ZVU Potez правялі тэхнічную экспертызу, якая дазволіць высветліць магчымасць выраблення чэскага піва на «Крыніцы»», – паведамілі ў канцэрне «Белдзяржхарчпрам». Чэскаму боку ўжо накіравана на разгляд юрыдычная база па франчайзінгавай вытворчасці ў Беларусі і праект ліцэнзійнай дамовы.

Бакі не выключаюць, што для арганізацыі вытворчасці чэскага піва на «Крыніцы» спатрэбіцца ўсталёўка дадатковага абсталявання, пастаўшчыком якога можа стаць кампанія ZVU Potez.

ААТ «Крыніца» з’яўляецца буйнейшым вытворцам піва ў Беларусі з доляй рынку ў 38,4% сярод мясцовых вытворцаў па выніках 2008 году. Аб’ём вытворчасці піва на прадпрыемстве склаў 13,577 млн дал, пры гэтым скараціўся на 6,4% у параўнанні з 2007 годам. Акрамя ўласных марак ААТ «Крыніца» вырабляе піва Kaltenberg па ліцэнзіі германскай кампаніі Konig Ludwig і піўныя кактэйлі Bandidos па ліцэнзіі кампаніі Pivovarna Lasko (Славенія).

Крыніца: www.belbeer.com

Не паспела ААТ «Крыніца» выпусціць 29 кастрычніка новы гатунак свайго піва – пшанічны «Kult», як ужо 28 снежня разліў гэтага гатунку пачаў ажыццяўляцца ў тару з абноўленай этыкеткай. Рашэнне аб рэстайлінгу этыкеткі было прынята пасля стараннага маркетынгавага даследвання, аналізу водгукаў спажыўцоў.

У якасці цэнтрльнага вобразу новай этыкеткі быў абраны белы аднарог. Па паданню аднарог валодае чароўнымі ўласцівасцямі і з’яўляецца сімвалам белага колеру і чысціні. «Сімвал чысціні мы звязваем з чысцінёй нашай вытворчасці, так як пры вытворчасці прадукцыі мы выкарыстоўваем толькі натуральныя кампаненты, без выкарыстоўвання ферментаў і дадаткаў», паведамляе прэс-служба кампаніі.

Таксама зменена шрыфтавое рашэнне, якое стала больш «выразным і еўрапейскім». Колеры новай этыкеткі больш яскравыя і насычаныя. Дарэчы, новы дызайн будзе выкарыстоўвацца таксама і ў афармленні бляшанкі «Kult» і этыкеткі гатунку «Kult цёмнае», якія хутка з’явяцца ў продажы.

Нагадаем, з 28.10.08 «Kult» паступіў у продаж у паўлітровых бутэльках, а з 30.12.2008 «Kult» выпускаецца ў ПЭТ упакоўках ёмістасцю 1 літр і ізатэрмічных КЕГах ёмістасцю 30 л.

Крыніца: belbeer.com