У суботу, 26 верасня, ў Мінску на плошчы Бангалор пройдзе піўны фестываль, які запланаваны ў межах сталічнага восеньскага кірмашу. Арганізатарам гэтага мерапрыемства выступае Мінгарвыканкам.

На дадзены момант пра жаданне прыняць удзел у дадзеным фестывалі паведамілі толькі чатыры буйнейшыя айчынныя вытворцы: «Крыніца», «Аліварыя», «Брэсцкае піва» і «Лідскае піва». Спажыўцам будуць прапанаваныя больш за 80 гатункаў беларускага піва, у тым ліку новыя для нашай краіны нефільтраваныя гатункі, і таксама «жывое» піва.

Канчатковае рашэнне па правядзенню фестывалю было прынятае толькі сёння. Некаторыя піўныя і навінавыя сайты сёння раніцай паведамілі пра адмену гэтага мерапрыемства, бо «нечакана» ўзніклі супярэчанні звязаныя з пляцоўкай правядзення. Але Мінгарвыканкам днём канчаткова паведаміў, што фестываль усё ж адбудзецца. Такім чынам, восеньскі піўны фестываль будзе праходзіць ад 10 да 16 гадзінаў 26 верасня на плошчы Бангалор у Мінску.

Віцэ-губернатар Санкт-Пецярбургу Міхаіл Асееўскі агучыў дату правядзення ўжо традыцыйнага фестывалю. XI «Пецярбурскі піўны фестываль» пройдзе 4 ліпеня 2009 году. Афіцыйнае адкрыццё адбудзецца днём, а 15-00 на плошчы ля Спартова-канцэртнага комплексу. У адрозненне ад мінулых гадоў, замест двух дзён, фестываль прадоўжыцца толькі адзін дзень. Гэта звязана ў першую чаргу з эканамічным крызісам.

Пецярбурскі фестываль збірае каля паўмільёны аматараў пеністага напою, якія выпіваюць больш за 200 тысяч літраў піва. У мінулым годзе дзейнічала каля 300 разліўных установак піва, функцыянавала 270 туалетных кабін, дзяжурыла каля 700 супрацоўнікаў міліцыі. У гэтым годзе на фестывалі акрамя піва будзе прадстаўлены і квас, частка якога нават будзе выдавацца бясплатна, а назва фестывалю стане трошкі больш даўгой – «Пецярбурскі фестываль піва і квасу».

Як і на ўсіх папярэдніх фестывалях, асноўная колькасць піва будзе прадстаўлена мясцовымі вытворцамі – кампаніямі «Балтыка» і «Heineken». У мінулым годзе пецярбуржцам і госцям фестывалю было прапанавана на выбар каля 30 гатункаў піва, такіх піўных брэндаў як «Балтыка», «Арсенальнае», «Неўскае», «Бачкароў», «Сцяпан Разін», «Carlsberg», «Tuborg», «Kronenbourg 1664», «Asahi» і інш.

Правядзенне «Пецярбурскага піўнога фестывалю», акрамя прафесійных конкурсаў і дэгустацый, суправаджаецца шырокай культурна-забаўляльнай праграмай, якая ўключае канцэрты папулярных рок-гуртоў, такіх як «Аліса», «Кароль і шут», «Сэнсавыя галюцынацыі» («Смысловые галлюцинации»), «Агата Крысці», «Крэматорый» і шмат-шмат іншых.

Асаблівая ўвага надзяляецца кантролю над выкананнем забароны аб продажы піва непаўнагадовым і падтрыманню чысціні і парадку на тэрыторыі мерапрыемства. На ўсёй тэрыторыі будзе дзейнічаць «Піўны дазор», які будзе прыцінаць продаж піва непаўнагадовым. Стымулам для падтрымання чысціні на пляцоўках фестывалю ў мінулым годзе з’яўлялася выдача бясплатных футболак у абмен на сабраную ў пакетык тару з-пад выпітага піва.

Photo © hoi.ru

Штогод 1 сакавіка ў Ісландыі адзначаюць Bjórdagurinn («Дзень піва»). Дэвізам ісландцаў і гасцёў краіны ў гэты дзень становіцца фраза: «Піць піва роўна столькі, колькі можна змясціць у сабе». У гэтым годзе спаўняецца 20 гадоў з адмены «сухога закону». Так што падвечар у Ісландыі вы наўраці знойдзеце хаця б аднаго цвярозага чалавека.

У Ісландыі «сухі закон» быў прыняты ў 1908 годзе на ўсенародным рэферэндуме, уступіў у моц у 1915 і дзейнічаў да 1 сакавіка 1989 году. Першапачаткова ён нес у сабе забарону на ўвесь алкаголь, але з 1935 году забароненым засталося толькі моцнае піва (з утрыманнем алкаголю ад 2,25% і вышэй). Дата прыняцця «Закону аб моцным піве» зараз з’яўляецца адным з найграндыёзных святаў Ісландыі.

«Дзень піва» адзначаецца ва ўсіх барах, рэстаранах і клубах страны. Акрамя таго, праводзіцца ўражваючы піўны фестываль. Больш за ўсіх гэтае свята любяць студэнты, практычна ўсе яны застаюцца ў піўных да самай раніцы. Нягледзячы на тое, што кошты на піва ў Ісландыі адны з самых высокіх у свеце (больш за 10 еўра за пінту), адзін дзень у годзе ўсе піўныя ўстановы перапоўненыя. Большасць бараў адчынена да 4 гадзін раніцы.

Зрэшты, не абавязкове ўвесь першы дзень вясны сядзець у піўнушках, можна прыняць удзел у разнастайных святочных праграмах, спаборніцтвах, ад гонак на снегаходах да стварэння скульптур са снегу, з’ездзіць з экскурсіямі на ісландскія бровары. Гэта абыйдзецца і танней, і пройдзе з большай разнастайнасцю.

За 20 гадоў пасля легалізацыі піва, у краіне адчынілася вялікая колькасць міні-бровараў, якія выкарыстоўваюць чыстыя крыніцы вады для варкі папулярнага напою. Піваварства ў Ісландыі стала нацыянальным гонарам. Адным з апошніх адчыніўся завод Mjodur у горадзе Стыккішолмур. Бровар быў заснаваны ў 2007 годзе, і адчыніў свае дзверы для публікі ў кастрычніку 2008. Экскурсія на гэты завод каштуе ўсяго 4$. За гэты кошт турыстам прапануюць ня толькі пабачыць увесь працэс піваварства, але і прадэгуставаць лепшыя ісландскія гатункі піва, напрыклад Jokull Bjor, што ў перакладзе азначае «Піўны ледавік». Найбольш папулярныя мясцовыя гатункі піва – Viking, Thule и Egils, добра вядомыя і за межамі Ісландыі.

4 красавіка 2009 году ў Мінску пройдзе Другі міжнародны з’езд калекцыянераў піўной атрыбутыкі. Арганізатарам выступае Беларускі клуб калекцыянераў піўной атрыбутыкі. Праграма з’езду традыцыйная: абмен, камунікаванне, піва, конкурсы.

Заяўкі на ўдзел і час пражывання неабходна падаць не пазней за 15 сакавіка. Усе падрабязнасці наконт самога з’езду і пражывання, а таксама кантактную інфармацыю арганізатараў можна знайсці на форуме: http://belbeer.borda.ru/?1-2-0-00000054-000-0-0-1235391794.

Першы міжнародны з’езд прайшоў у красавіку 2008. У з’ездзе прынялі ўдзел каля ста калекцыянераў з Беларусі, Расіі, Украіны, Латвіі, Літвы, Польшчы, Германіі, Чэхіі. У межах з’езду прайшоў конкурс-дэгустацыя беларускаага піва сярод замежных удзельнікаў, а таксама паказ піўных этыкетак піўзаводу «Крыніца» ад моманту ягонага адкрыцця да нашых дзён.

Рух калекцыянераў піўной атрыбутыкі зарадзіўся ў Беларусі ў канцы 1980-х гадоў. Беларускі клуб калекцыянераў піўной атрыбутыкі быў заснаваны вясной 2006 году.

Photo © Alivaria

Інжынер з Каларада Кодзі Крыстман атрымаў тое, аб чым марыць кожны аматар піва: ён можа да канца жыцця бясплатна піць піва ў сваім любімым пабе. У выпадку з Крыстманам, гэта паб бровара Wynkoop, дзе ў суботу падчас фіналу конкурсу, спансаванага кампаніяй Wynkoop, ён і быў узнагароджаны тытулам «Півахлёб Году 2009».

«Я не магу паверыць у гэта, – сказаў лёсік пасля перамогі. – Напружанне ў зале было настолькі моцным, што ўсе чакалі выніку стоячы.» У двухгадзінным спаборніцтве, перад стаячым усхваленым натоўпам, пераважна з ягоных прыхільнікаў, Крыстман здолеў перасягнуць іншых фіналістаў – Марка Энджэлуса і Філа Фарэла.

У адрозненне ад папярэдніх «Півахлёбаў», Крыстман (з 1991 году амаль кожны вечар пятніцы праводзіць у пабе Wynkoop), знаходзіцца ў істотна больш зыскоўным становішчы ў дачыненні да галоўнага прызу спаборніцтва – бясплатнаму піву на ўсё жыццё ад Wynkoop. «Вой, я буду хадзіць туды, атрымліваць асалоду да канца свайго жыцця» – кажа ён.

«Але перамога, – дадае Крыстман, – гэта таксама пацверджанне ўсіх тых піўных рэчаў, якія я зрабіў. І зараз я з’яўляюся часткай асаблівай групы тых, хто калісьці атрымліваў гэты тытул. Гэта вялікі гонар для мяне.»

Суддзі 45 хвілінаў вырашалі, перад тым як абралі Крыстмана. «Я мяркую, складаней было быць суддзём, чым фіналістам гэтага конкурсу» – кажа Мэтт Вензке, півахлёб 2008 году і адзін з суддзяў фіналу гэтага году. Сумесна з Вензке, суддзямі конкурсу былі Том Чыккатэры (півахлёб 2005 году), Дзік Крэк (дэнверскі піўны каментатар са стажам), Алан Моен (рэдактар «Навінаў Піваварства Паўночнага Захаду»), Джуля Герц (дырэктар па маркетынгу Піваварчай асацыяцыі), Эндзі Браўн (кіраўнік бровара Wynkoop) і Джонатан Шайк (сурэдактар і піўны журналіст «Вэстварду»).

Крыстман з’яўляецца таксама першым «Півахлёбам Году», хто жыве не на ўсходнім альбо заходнім узбярэжжы Амерыкі. У сваёй заключнай прамове ён сказаў аб сваім жаданні прадстаўляць ня толькі аматараў піва Амерыкі, але ў асобнасці і аматараў піва з Каларада і рэгіёну Скалістых гораў.

«Я прысутнічаў на папярэдніх фіналах гэтага конкурсу, – кажа Крыстман, – і дзівіўся, ‘Чаму тут няма нікога з Каларада?’» Крыстман, які нарадзіўся ў Мантане, сказаў таксама з надзеяй, што ў ягоным родным штаце будуць больш аддаваць увагі піву. «Мантана мае багатую піўную традыцыю, там адзін бровар прыходзіцца на кожныя 43 тысячы чалавек. Але там не дастаткова асэнсоўваюць гэта. Я спадзяюся, гэта хутка зменіцца.»

У пошуках піўной гісторыі і культуры, Крыстман наведаў 19 краінаў на чатырох кантынентах, і наведаў больш за 200 бровараў. Хатнім піваварствам ён займаецца з 18 гадоў і з’яўляецца сябром Амерыканскай асацыяцыі півавараў-аматараў з 1991 году.

Крыстман таксама выйграў аплочаны чэк на 50$ у пабе Wynkoop, і магчымасць зварыць разам з Эндзі Браўнам спецыяльнае піва да наступнага конкурсу «Півахлёб Году». Таксама атрымаў майку, якая пацвярджае, што ён з’яўляецца «Півахлёбам Году 2009», а ягонае імя будзе выгравіравана на пераходзячым трафее і праслаўлена як імя ганаровага півахлёба.

Photo © thefullpint.com

Трынаццаты конкурс «Півахлёб Году» пройдзе 21 лютага ў пабе Wynkoop. Змагацца за гэты тытул будуць тры амерыканскія аматары піва са штатаў Джорджыя і Арэгон, і горада Дэнвер.

Дасягненні фіналістаў, якія атрымалі найбольшую колькасць галасоў, уражваюць. Так, заўзяты півахлёб Марк Энджэлус, пракурор з Арэгона, за 2008 год выпіў 1029 куфляў піва, наведаў 93 бровары ў Штатах і трох іншых краінах, а на піўных фестывалях у сваім родным штаце выпіў 244 куфлі арэгонскага піва. Марк быў фіналістам гэтага конкурсу і ў мінулым годзе. Коды Крыстман, праграміст з Дэнвера, пакаштаваў піва ў 19 краінах свету і наведаў больш за 200 бровараў, з’яўляецца піваварам-аматарам са стажам. Філ Фарэлл, пілот з Джорджыі, півавар-аматар, піўны суддзя і фіналіст конкурсу «Півахлёб Году 2007». Ён пакаштаваў піва ва ўсіх краінах Еўропы, наведаў 1000 пабаў, а таксама 400 пабаў-бровараў ва ўсім свеце.

21 лютага гэтыя фіналісты прадстануць перад журы, у склад якога ўвайшлі пераможцы папярэдніх конкурсаў і піўныя эксперты. Суддзі (у традыцыйных судзейскіх парыках і мантыях) вызначаць пераможца пры дапамозе ўсемагчымых складаных піўных пытанняў. «Півахлёб Году 2009» атрымае магчымасць усё жыццё піць бясплатнае піва ў пабе бровару Wynkoop, магчымасць выпіць піва на 250$ у сваім мясцовым пабе, а ягонае імя будзе выгравіравана на пераходзячым трафее «Півахлёба Году» і праслаўлена як імя найвялікшага аматара піва Амерыкі.

www.wynkoop.com

Photo © Owen Ogletree